storm comes

When that storm comes
Don’t run for cover

: )

رسماية

لازلت أرى الدنيا
طيور تحلق بين السحاب
بيت يبتسم :)
شجرة تُضلل على البيت
ولد يطيّر طيارة ورق
وبنوته تلعب بالحديقه
وشمس فى طرف ورقة الرسم
بتضحكلى ,,, !

أبيض فى لبنى

لو أننى أستطيع الجلوس على احدى السُحب البيضاء
أفرد يدى وأتنطط من سحابة لأخرى
ألف وادوّخ وأرقص ... :)

متعه القراية :)

هافف عليا أوى
أرجع قارئه أكتر من كتابه
للقراية موهبه زى الكتابه بالظبط
مش أى حد يقرأ .. فى ناس كتيرة عندها موهبه حب القرايه
بتغوص وبتتعمق فى الكلمات وبتعرف تتعامل برقه مع الحروف وما وراء السطور
لدرجه انها بتكتب جميل جدا .. بس بتفضل تكون قارئه أكتر
ترتشف اكتر ما تنزف :))

وعلى العكس تماما
كتّات بيكتبوا ويؤلفوا كتب لكن مش عندهم ملكة انهم يقرأوا لغيرهم

عندهم حب ذاتى .. وشخصيه نرجسيه .. لدرجه انهم يعبدوا حروفهم .. !

والايام دى عندى حاله من الوجد
أنى اقرأ واقرأ واقرأ سواء كتب أو مدونات
أعمل ريفرش لأفكارى .. أعيش وسط احاسيس الناس اللى بتكتب
أرتشف ايضا أكتر ما أنزف :))

انتظرونى هكون دايما على باب مدوناتكم
اسكن بقلوب حروف غيرى ..
اعيش معكم واتعايش بكم :))

حديقة كوكنهوف :)

حفل تتويج الملكه ..

وهل يوجد ملكات غير الزهور والورود .. !

أشك :)

بعد طول عمل شاق فى تجميل ورعايه الحديقه طول الفترة اللى فاتت

فتحت حديقه كوكنهوف ابوابها أخيرا للزائرين هذه الايام

حديقه من أروع وأكبر الحدائق فى العالم

كوكنهوف ليها معنى " المصابيح التى زرعتها يد فى الخريف "

يمكن مش هيكون لى فرصه انى أزورها الربيع ده

بس مسيرى فى ربيعٍ ما أزورها .. :)

isA

أكيد هحطها فى قايمه الاماكن اللى هزورها وانا بلف العالم D:

جيالك يا هولندا D:

بصراحه معرفتش أحط انهى فيديو

أن قولت أشاركم معايا بمقتطفات

واللى حابب يعيش مع الحديقه يتفرج بنفسه على اليويتوب مع بقيت الفيديوهات :)

أسيبكم مع " زهور الروح "

فعلا شوف الزهور واتعلم :)

هل رتبت داخلك اليوم :)

أكيد كلنا بنهتم بترتيب أودتنا .. تنفيض البيت من التراب
ترميم كل ما هو مكسور ..

لكن عمرنا فكرنا نرتب اللى جوانا
ننفض داخلنا من التراب والعناكب وكل ما هو زاحف من افكار سيئه .. !

لو بصينا على كميه التراب المتراكم على ذاكرتنا
والهموم اللى شايلنها .. والأفكار العفنه اللى ممكن تقتلنا ..
يمكن نتخض من الكم الهائل من الكراكيب الغير مستعمله
واللى عفى عليها الزمن ومحتاجه تجديد ...

زى ما البيوت محتاجه دايما يدخلها الشمس والهوا النقى
جوانا دايما محتاج لشمس ونور .. وهوا نقى من الافكار الايجابيه
الا وهنموت من العتمه والخوف والضلمه
اللى كتير مننا بيبنيها بأيده ويدمر بيها نفسه

محتاجين نرمم داخلنا لينا ولنفسنا
وعشان يكون فى استقبال كل البشر اللى هيدخلوا لحد أعماقنا
غلطنا أننا بندخل فى صداقات وعلاقات جديده
محملين بقدر كبير من الشحنات السلبيه .. مثقلين بكل ما هو كبير الحجم وقليل الاستخدام
أشياء انتهت صلاحيتها من زمن ..
ومصممين على استعملها طول طريقنا .. !

أنا كمان محتاجه لده .. محتاجه أفضى واتخلص من كل الكركبه
والفوضى اللى جوايا .. أدخل الحياة خفيفه الوزن .. حامله فقط كل ما هو ينفعنى
فيما هو أتٍ ..
محتاجه لبرايه وأستيكه وغساله .. ومنفضه .. ومكنسه وكل ادوات التنظيف
اتعصبت .. ولبست هدوم الشغل
ورايا تنضيف وشغل كتييير
أيدكم معايا .. ولا هنضف لوحدى .. D:

كلاكيع على الفاضى ,,,

امبارح كان يوم عجيب بمعنى الكلمه .. حضرت حفل توقيع د. جلال أمين ..

بصراحه مكنتش قريتله قبل كده .. أسمع عن عائله أمين

ولكن من هو د. جلال أمين وماذا يقول .. دا اللى كان نفسى اعرفه

أول ما دخلت زحمه جدا .. لقيت كرسى فاضى فقعدت .. انى أفهم كلمه .. أبدا

اللى خلانى أكمل واتبع فضولى عن هذا الرجل .. أنه كان بيضحك وينكت .. فتفائلت :)

الاسئله كانت بسيطه معظمها من الشباب .. قرأوا كتبه ومتابعين ما يحدث على الساحه

وخلص التوقيع بسرعه .. وانتقلنا لمكان تانى لتكمله الحديث .. وكمان عشان أفهم ايه اللى بيحصل ؟!

دخلنا القاعه وقعدنا .. كلام مجعلص .. اقتصاد سياسه .. عبد الناصر .. السادات .. مبارك

العصر الملكى .. الديكتاتوريه .. امبراطوريه ..3 محاور ؟!

فجاة حسيت ان النور اطفى .. والدنيا اسودت .. ورجعت 100 سنه لورا ..

طبقه من اللى بيقولوا عليها مثقفين .. كلام مكلكع .. معقد .. مش قادرة أفهم منه حاجه

والناس كتيرة .. والقاعه زحمه .. كل دوول فاهمين ايه اللى بيحصل ؟!

ياأما انا جاهله بالثقافه .. أو هما كلهم جاهلين بمعنى الحياة ؟!

كنت قاعده بضحك .. افتكرت منظر سعيد صالح فى مسرحيه العيال كبرت

وأحمد ذكى بيقول كلام كبيييير .. وسعيد صالح بيهز راسه كأنه فاهم

وفى الاخر قاله .. قولنا كلام شعبى سلس لذيذ أفهمه .. !

فضولى هيقتلنى .. عاوزة أفهم .. الكلام كبييييير .. صدعت .. ودوخت من عمو اللى قدامى

ضخم الجثه عريض المنكبين شلولخ .. وكل شويه يتحرك ومش ثابت فى قعدته ..

اتنقلت من مكانى .. علاّ وعسى انى افهم .. مفيش ؟!

وشوش .. وشوش .. أقنعه .. طبقات .. مثقفين .. استقراطين .. مالين .. بريستجين

وكل اللى بفكر فيه .. نفسى أشرب ميه ساقعه .. !

ناس من عصور تانيه .. من جيل تانى .. تفكير تانى .. لغه تانيه !

واخييييرا وبعد طول انتظار .. صحفيه شابه قامت وعلقت .. يمكن دى الوحيده اللى فهمت بتقول ايه

طب الحمد لله يعنى لسه بفهم .. فى أمل انى أفهم .. !

مكنتش متخيله أنى لما كنت بمشى فى المظاهرات وانا صغيرة

ووالدى حذرنى انى امشى جمب الحيط .. انى طلقت السياسه بالتلاته ورميتها ورا ضهرى

وانى طبقت كلامه بالحرف .. أمال كنت بقرأ فى ايه طول الايام اللى فاتت

مش كانت ثقافه .. وساسيه بلغه ابسط ؟!

وأخر ما زهقت .. قومنا وخرجنا .. مفوقتش من الصدمه الا وانا قدام منظر النيل

وكأن المنصورة قطعه من باريس .. مدينه النور :)

مش عارفه الناس المكلكعه دى عايشين ازاى ؟!

كلام كله كلام .. خرجت وايه اتغير من كلامهم ..

الناس هيا الناس .. لسه فيه زحمه وناس بتتشاكل على الهايفه

ناس بتقطع بعضها على جنيه .. ومعامله سواقين التاكسى وعصبيتهم

ماشيه وكل حاجه متغيرتش زى ما كانت قبل ما أحضر واسمع الكلام المجعلص ده ؟!

قولت ما بدهاش وهوا المنصورة جميل .. اشتريت لب .. وكلت ايس كريم بالشوكلاته

كلت بنهم .. شربت لما ارتويت .. شغلت فيروز

خدت حمام ساقع أفضى دماغى من كل الكلام المعقد ده !

لعبت مع ولاد أخواتى الصغنتتين وكأن رجعت لايام طفولتى :)

الحياة أبسط من كده يا اخوانه !

رجعت للبساطه .. عشت الحياة .. حباها بكل جمالها وقرفها

فى بلد مفيش اى شئ بيتغير فيها ..

وكله كلام ..كلام .. كلام .. كلام !

فى ناس بتموت من ادمان المخدرات .. وناس بتموت من ادمان أفكارها

وناس بتموت من ادمان ذاتها .. مع اختلاف الوسائل

لكن متشابهين فى جهلهم بمعنى الحياة ؟!

ازاى تقدر تكون شوكه فى ضهر كل أعداء الحياة

شوكه مؤلمه .. بحبك للحياة .. بشجره الحب اللى بترويها جواك وسط

وطن دخل سن اليأس .. !

( تعليقى كله على الناس المكلكعه .. مع احترامى للكاتب الكبير د. جلال أمين )