امبارح كان يوم عجيب بمعنى الكلمه .. حضرت حفل توقيع د. جلال أمين ..
بصراحه مكنتش قريتله قبل كده .. أسمع عن عائله أمين
ولكن من هو د. جلال أمين وماذا يقول .. دا اللى كان نفسى اعرفه
أول ما دخلت زحمه جدا .. لقيت كرسى فاضى فقعدت .. انى أفهم كلمه .. أبدا
اللى خلانى أكمل واتبع فضولى عن هذا الرجل .. أنه كان بيضحك وينكت .. فتفائلت :)
الاسئله كانت بسيطه معظمها من الشباب .. قرأوا كتبه ومتابعين ما يحدث على الساحه
وخلص التوقيع بسرعه .. وانتقلنا لمكان تانى لتكمله الحديث .. وكمان عشان أفهم ايه اللى بيحصل ؟!
دخلنا القاعه وقعدنا .. كلام مجعلص .. اقتصاد سياسه .. عبد الناصر .. السادات .. مبارك
العصر الملكى .. الديكتاتوريه .. امبراطوريه ..3 محاور ؟!
فجاة حسيت ان النور اطفى .. والدنيا اسودت .. ورجعت 100 سنه لورا ..
طبقه من اللى بيقولوا عليها مثقفين .. كلام مكلكع .. معقد .. مش قادرة أفهم منه حاجه
والناس كتيرة .. والقاعه زحمه .. كل دوول فاهمين ايه اللى بيحصل ؟!
ياأما انا جاهله بالثقافه .. أو هما كلهم جاهلين بمعنى الحياة ؟!
كنت قاعده بضحك .. افتكرت منظر سعيد صالح فى مسرحيه العيال كبرت
وأحمد ذكى بيقول كلام كبيييير .. وسعيد صالح بيهز راسه كأنه فاهم
وفى الاخر قاله .. قولنا كلام شعبى سلس لذيذ أفهمه .. !
فضولى هيقتلنى .. عاوزة أفهم .. الكلام كبييييير .. صدعت .. ودوخت من عمو اللى قدامى
ضخم الجثه عريض المنكبين شلولخ .. وكل شويه يتحرك ومش ثابت فى قعدته ..
اتنقلت من مكانى .. علاّ وعسى انى افهم .. مفيش ؟!
وشوش .. وشوش .. أقنعه .. طبقات .. مثقفين .. استقراطين .. مالين .. بريستجين
وكل اللى بفكر فيه .. نفسى أشرب ميه ساقعه .. !
ناس من عصور تانيه .. من جيل تانى .. تفكير تانى .. لغه تانيه !
واخييييرا وبعد طول انتظار .. صحفيه شابه قامت وعلقت .. يمكن دى الوحيده اللى فهمت بتقول ايه
طب الحمد لله يعنى لسه بفهم .. فى أمل انى أفهم .. !
مكنتش متخيله أنى لما كنت بمشى فى المظاهرات وانا صغيرة
ووالدى حذرنى انى امشى جمب الحيط .. انى طلقت السياسه بالتلاته ورميتها ورا ضهرى
وانى طبقت كلامه بالحرف .. أمال كنت بقرأ فى ايه طول الايام اللى فاتت
مش كانت ثقافه .. وساسيه بلغه ابسط ؟!
وأخر ما زهقت .. قومنا وخرجنا .. مفوقتش من الصدمه الا وانا قدام منظر النيل
وكأن المنصورة قطعه من باريس .. مدينه النور :)
مش عارفه الناس المكلكعه دى عايشين ازاى ؟!
كلام كله كلام .. خرجت وايه اتغير من كلامهم ..
الناس هيا الناس .. لسه فيه زحمه وناس بتتشاكل على الهايفه
ناس بتقطع بعضها على جنيه .. ومعامله سواقين التاكسى وعصبيتهم
ماشيه وكل حاجه متغيرتش زى ما كانت قبل ما أحضر واسمع الكلام المجعلص ده ؟!
قولت ما بدهاش وهوا المنصورة جميل .. اشتريت لب .. وكلت ايس كريم بالشوكلاته
كلت بنهم .. شربت لما ارتويت .. شغلت فيروز
خدت حمام ساقع أفضى دماغى من كل الكلام المعقد ده !
لعبت مع ولاد أخواتى الصغنتتين وكأن رجعت لايام طفولتى :)
الحياة أبسط من كده يا اخوانه !
رجعت للبساطه .. عشت الحياة .. حباها بكل جمالها وقرفها
فى بلد مفيش اى شئ بيتغير فيها ..
وكله كلام ..كلام .. كلام .. كلام !
فى ناس بتموت من ادمان المخدرات .. وناس بتموت من ادمان أفكارها
وناس بتموت من ادمان ذاتها .. مع اختلاف الوسائل
لكن متشابهين فى جهلهم بمعنى الحياة ؟!
ازاى تقدر تكون شوكه فى ضهر كل أعداء الحياة
شوكه مؤلمه .. بحبك للحياة .. بشجره الحب اللى بترويها جواك وسط
وطن دخل سن اليأس .. !
( تعليقى كله على الناس المكلكعه .. مع احترامى للكاتب الكبير د. جلال أمين )
هناك تعليقان (2):
الماسورة اتفتحت بالظبط قبل مانمشي بشوية يا سوسو.
بالنسبة لي كلام د.جلال كان بسيط ومفهوم، المناقشات هي اللي كانت رافعة علم (أنا بقول كلام كبير، إذن أنا مثقف).
طبعا انا معرفتش استمتع بمنظر المنصورة من فوق :D
أنا وصفت احساسى يا رونا
فعلا انا كنت عامله زى الاطرش
فى الزفه .. مش عارفه ايه اللى بيحصل
يمكن لان الجو جديد عليا
ومتاخده شويه
ونوهت ان كل كلامى على المناقشات
بعيد عن د. جلال :))
كأنى فى عصر الطرابيش والمنشه
عموما طبعا كان يوم لذيذ
لاننا كنا سوا ..
واتعرفت على ناس جديده
ومكان جديد :))
إرسال تعليق