حلم ..

حلم .. مجرد حلم ..

لما قريت تجربه الاستاذه نعمات البحيرى فى مواجهه السرطان
فى كتابها " يوميات امراءه مشعه "

بتحكى عن ألمها .. وازاى قدرت تقهر ألمها ووجعها النفسى
اللى بتحسه اى امراءه وخصوصا لما تُفاجئ انها مصابه بسرطان الثدى ..

وبفكر فى مدى هبوط الماده الاعلانيه فى مقاومه سرطان الثدى
هو مينفعش نوعى الناس الا بطبل ورقص ونجيب مغنين يقولوا للناس
تعالوا افحصوا نفسكم .. ؟!

فى ناس بسيطه صحيح مش هتفهم كلام طبى مجعلص بحت
لكن كمان فى تعليم ببساطه وبسهوله للمواطن البسيط اللى فى الشارع ..!

وبعد حضور المؤتمر الطبى " السرطان بين الحاضر والمستقبل "
الذى أُقيم فى المنصورة يوم الخميس اللى فات ..
طب والماضى فين .. كل حاجه دايما ليها ماضى بنتعلم منه .. !

واللى بشوفه وبسمعه من حكايات ..

زارتنى امبارح أحدى صديقاتى من ايام الثانوى ..
أجرت عمليه ازاله بالغده الدرقيه بعد ما تأكد ان فيها ورم
وحكتلى عن جمال مبنى المستشفى .. ومدى تطورها ونضفتها
وسابت كومنت .. ضيع كل اللى قالتله
قدمولى " يوسفى " تبع الوجبه حجمها كبير جدا لدرجه انى مصدقتش انه استوفاندى .. !
مرضتش تاكلها .. ولما العامل جه وخد الاكل وسأل مكلتيهاش ليه
قالتله كل دى استوفانديايه ... قالى عادى هيه متهرمنه فيها هورمونات ... !

لسه بترن فى ودانى كلمه دكتور كان بيلقى فى المؤتمر

الدكتور مش هيعرف يعمل سبورت نفسى للمريض
دى مش وظيفته .. وظيفه الدكتور النفسى ...!

ازاى .. يعنى لما مريض يدخل على دكتور
ماسك موبيل وبيتكلم فيه .. ومش حاطط فى اعتباره ان المريض ده
انسان .. ممكن يكون اخوه .. والده .. والدته .. !
حاله المريض هتكون عامله ازاى .. ؟

المفروض يدوا كورسات من اصغر عامل لاكبر دكتور
فى معامله المريض وخصوصا مريض السرطان ..
حتى اهله وكل قرايبه ولو وصلت للجيران .. وخصوصا طقم الممرضات
دا لو بس ابتسامه .. ويبطلوا البوز بتاعهم ده !


ثم مش اسمه مريض دا فى الاول والاخر انسان .. بشر .. بنى ادم
ليه اسم وكيان وروح زينا بالظبط وكلنا معرضين نكون مكانه !
مش كائن فضائى .. ولا ذات هلاميه غريبه عننا ..

بفكر فى معادله متوازنه ..
مستشفى نضيفه واجهزة متطورة + معامله كويسه أكيد هتساوى صحه احسن
وحياة أحلى
مش هينفع مستشفى متطورة وعلى اعلى مستوى والمعامله صفر
ولا العكس ... !

وكفايه ندخل ونحول الدين بتاعنا لعبارت وشعارات وبس
الدين قال المؤمن مبتلى .. وفى نفس الوقت لا تتمنوا البلاء لأنفسكم
لان ربنا عارف ان فى مننا هيتحمل الالم وفى لاء ..

فعلا انا بحلم حلم كبير وصعب وعارفه انه صعب
مش بحلم ان مريض يتعافى ومعامله كويسه ودكاترة عندهم ضمير وبس
بحلم ان نعيش ولو يوم واحد الكره الارضيه كلها
تكون خاليه من اى مرض .. من اى حد بيتألم ألم نفسى او عضوى
عارفه انى طماعه .. وحد يقول دى مجنونه .. وحد المرض جند من جنود الله
وأراء كتير ....

بس انا واثقه ان اليوم ده هيجى
وان الارض فى يوم هتعيش اليوم ده
يوم خالى من اى منغصات
يوم هتكون الارض فيه فى ابهى حالتها جنه الله
والناس مبسوطه وسعيده وكلهم بيعاملوا بعض كويس
ويمكن تكون ساعتها تكون دى بدايه النهايه ,,,,

نقطه ومن أول السطر .

اسلحتى الخاصه (2)

فيلى الكميل .. اللى طبعا مقتنعه انه هو اللى ملك الغابه D:
ونجمه فسفورية
ومش نجاح فى الكليه ودرجات وتقدير
لاء انا بدور على النجاح الاكبر
نجاح فى رسالتى الكبيرة اللى جيت الدنيا عشانها
ولازم ومصممه قبل ما امشى اسيب بصمه انى كنت هنا فى يوم
نجاح .. يرضينى .. يرضى ذاتى
يخلينى أكتب أخر كلمه فى مفكرتى
انى راضيه عن نفسى .. وعن ربنا .. وعن كل الناس
وانى مبسوطه ;-)

سبحتى ذات اللون الازرق (اللون اللى بحبه )
أمسكها كل ما يمر عليا مواقف وأزمات صعبه وحاجات فوق طاقتى
هديتى من أعز وأجمل وأحلى صديقه ليا فى الدنيا
*@ لا يدوم اغترابى @*
كلما تشبثت بها .. أتذكر كلماتها وهيا بتهديهانى
(كل ما يمر عليكى موقف صعب امسكى فيها .. كأنك ماسكه فى ايدى بالظبط
عمرى ما مسكتها فى مرة وانا تعبانه او مكتئبه او مهمومه
الا وكانت أمورى بتعدى بسلام .. أشعر بيدها تربت على يدى وتقول
هنعديها سوا .. هنتعجز على بعض ونعديها
أنا معاكى .. أحنا سوا :)

نجمه.. وشمع برائحه ذكيه .. وألوان مائيه .. وبراءه وتلقائيه ;-)
أسلحتى كلما أردت الهروب من هذا العالم المخوخ
تجويف يجعل من داخله يهوى الى كل ما هو دموى .. وسطحى .. وأنانى !

رسمتى المفضله ..
ارسمها كلما مسكت قلم رصاص وورقه بيضاء
فى أوقات الملل والسرحان ..
ابتسامه :)
وبيت له طعم العيله واللمه
برج الحمام والعصافير
الشجره الخضراء
والسما الزرقاء
وأرض خصبه برائحه الطين :)

خطى .. ورسمى .. وبرده فيل D:
كلمات بتقوينى ..
علمتهالى صديقتى لا يدوم اغترابى .. ( اللى برده جابتلى السبحه هديه D: )
أتمتم بها كل ما أقبل على أشياء جديه فى حياتى
كل ما أحس انى لوحدى .. ومفيش حد معايا وواقف جمبى
كفاية احساسى بأنى ربنا أرحم بينا من أقرب الناس لينا
وعمره ما هينسانى .. ودايما بيدينا هدايا بس احنا بننسى وبنبعد
ولكنه هيفضل كريم وودود ومستنى نرجع ;-)

نقطه ومن أول السطر .

أفتحت عينى .. أحاول أتشبث بغطاء سريرى وكأنى أتشبث بالحياة
لتهبنى يوم واحد (كمان) جديد محمل بالمفاجأت
أحاول أتذكر الحلم الذى كنت أحلم به
نجوم .. أطفال صغيرة ومن بينهم أنا أقفز من نجمه لاخرى ..
اليوم ميلاد التجربه..
ميلاد شهر جديد..
لا أصدق .. أسمع صوت أمى .. تجرى مسرعه الى الشرفه
تزيل الملابس .. الدنيا بتشتى .. السما بتبتسم مطر
دخلت الشمس غرفتى معلنه وجودها
ريحه المطر .. مازلت لا أصدق !
كنت واثقه ان الصيف مش هيحل الا لما السما تودعنى بمطره أخيره ;-)
من بعيييييد .. صوت ماجده الرومى
شو معنى هالحياة
حلم وماااارق ساعااات
الباقى من عمرى بهديك
عمرى لحظه بتناديك ...

لازلت أتذكر الشهاب الذى رأيته يوم اكتمال القمر وبكائى
من سحر وجمال العالم وقد أعطى البشر له ظهورهم !
لحظاتى الجميله مثل هذا الشهاب ما أن تظهر وتشتعل حتى تختفى !

تداهمنى التوهه التى أشعر بها كلما شاهدت فيلم زى النهارده
وألف مبروك .. يجتاحنى سؤالى الذى لا أجد له اجابه
لو ان شئ ما ضرب كوكب الارض .. بم أتشبث ؟
لو أننى غدا لم أكن موجوده هنا ؟

أفتح درج مكتبى .. وأخرج كتبى المفضله لدى التى اشتريها ومعى لها ذكريات
.. وأجلس بأيها ابدأ ؟

تقول أمى ان كتبى الادبيه أكثر من كتب الطب !
الكتب دى اللى هتخسرنى .. ومش هتنفعنى بحاجه !
ولكن دائما أنسى أن اصطحبها معى فى جوله سحريه لأريها العالم
من فوق الكتب .. أأخذ بيدها لتصعد معى فوق الظلمه فوق الخرس فوق الخوف فوق الروتين !
ولكنها دائما تخاف جنونى D:

أقضى معظم الوقت بغرفتى .. مكانى المفضل
أعلق بها أحلامى .. أزينها بكل الاشياء المتفائله .. استعدادا للحرب
والصدمات على أرض الواقع بكل ألمه وحلاوته !
أقل من سنه تفصلنى عن العالم الخارجى .. بكل ما يحكون عنه !
قربت من عنق الزجاجه !

أفتح أجندتى لأكتب كل ما هو تافه .. فرانكو أرب حتى لا يستطيع أحد ان يقرأها
أنا أيضا بعد انتهائى من الكتابه لا أستطيع قرأتها
ربما لو دخلت التاريخ ستحتاج لفك شفرات حجر سنسن D:

أريد أن اشترى أشياء كثيرة .. وأرى أشياء أكثر
ولكن اتفاجأ دائما .. أن أهم شئ أريد ان اشتريه هو مفاتيح وأقفال !
مفتاح لباب غرفتى أغلقه وأصفع بابه فى وجه العالم عندما أصرخ من غبائه
أتمتم يارب ارحم كل المجانين الذين يعيشون فى هذا العالم !
قفل على باب صندوق ذكرياتى الجميله .. فلا يخدشه أحد اذا غدرت بى الايام
وأصابنى الزهايمر .. ماذا سأفعل وقتها .. من سيساعدنى على تذكرها أو تجميعها !
قفل على اجندتى .. فلا يتطلع اليها أحد بفضوله .. ويجرحها بتعليق سخيف
فمهما كانت هيا جزء منى وأنا منبعها !
قفل ومفتاح سرى لهاتفى .. لجهازى الألكترونى .. فلا يعبث بهم أحد !
قفل على درج مكتبى الذى أخبئ به أدوات وكراسه الرسم .. وأهم الاشياء
التى أهرب اليها كلما أحسست بغربه وافتقدنى بشده .. لعلنى أجدنى من بينها !

الى متى وسيظل الجميع لا يبالون بما أشعر بما أفكر
هم لا يبالون وأنا سأظل أضع قفل ومفتاح بل وأسوار لأحمى فضائى الداخلى
من عبث أيديهم !

نقطه ومن أول السطر .

خانقين نفسنا ليه ؟

عمرك حسيت انك عايش
فى علبة سردين ؟!

تخيل .. اسرح بخيالك .. حياتك كلها دلوقتى فى علبة سردين !

ياترى شكل حياتك فيها ايه ؟

حياة روتنيه !
مسالم تماما ..
كل يوم شبه اللى قبله مفيش جديد
ماشى فيها جمب الحيط ما هو يا دوب مكانك على قد جسمك

خايف ... !
خايف من بكرة من المستقبل
خايف حتى من انك تقتحم الحياة بقلب فارس شجاع

دايما بترجع لورا .. !
بتفكيرك
دايما عايش فى الماضى
وسط الذكريات
بتصرخ من المك
ضميرك بيعذبك

دايما ندمان على اخطاء عملتها .. !
فى البيت فى الشغل مع الاهل مع الاصحاب مع نفسك
حتى مش عاطى فرصه تسامح نفسك او تصالح اللى حواليك
ودايما فى صراع داخلى مع نفسك وحرب نفسييه قايمه جواك
بين حد جواك عايز يحقق ذاته او يحقق اللى غيره عايزه
بين حد عايز يعمل كل حاجه صح وحد مش عايز حد يفوق من غيبوبه يوميه

بتحب تعيش فى الضلمه .. !
يتقفل عليك باب العلبه وتفضل مستخبى ورا الباب ده
لو شويه نور دخلوا واتوارب الباب تتألم لان ضميرك ساعتها بيصحى

مش بتعرف تقول لاء .. !
لاء للظلم لاء للسلبيه لاء للغيبوبه
دايما ماشى مع اللى ماشى

بتحب تعيش على الهامش .. !
ملكش دور اساسى فعال حتى ولو بسيط
مش شرط تكون بطل ولا سفير للنوايا الحسنه ولا حتى عالم ذرة
بس ليك ابتسامه وقلب طيب وعقل حكيم

وكتتيير اسرار كتيرة مستخبيه جوا علبه السردين
ميعرفهاش غير اللى رضوا يستمروا ساكنين فيها حتى نهايه مطافهم
حكايات وقصص من كل شكل ولون

بس امتى هنقرر اننا نخرج من علبة السردين
امتى هنعرف نفرد اجنحتنا ونطير بيها لسما فضاءها واسع
امتى هنعرف ان فيه مكان اوسع بحر كبيير نستحق اننا نعيش فيه
وان حياتنا أكبر واوسع من اننا نسكن فى مجرد علبة سردين ؟!

7000 و 23 سنه D:

كل سنه وانا وانتِ ( اللى هو انا برده D: ) فى نمو
وفى خير وسعادة يارب
عيد ميلادى التانى فى التدوين
وعيد ميلادى ال 23 على الورق والنتيجه
أما اللى عشته بقى
فتميييييييييييييت سبع تلااااااااف و *@ 23 @* سنه
على اساس انى ابنة الفراعنه طبعا D:

أما لو حسبته بالمجرات والسنين الضوئيه
فمش هعرف أعد بقى
بس حاسه انى عشت كتيييير وخلاص D: D:

وأن كنت بحتفل السنه دى بعيد ميلادى
فدا بقى لسببين بس
الاول عشان أكافئ نفسى على كل تغير اتغيرته للاحسن
يمكن سنسن تعبت معايا الفترة اللى فاتت
لكن من حقها النهاردة وبكرة تفرح وتظأطط :))

والتانى لان فرحانه اويييييييييي ان حواليا كل اصحابى وكل اللى بحبهم
وجودهم جمبى بقلوبهم البيضا اللى زى اللبن الحليب
يخلينى اسعد واحده لان معايا كنز مش هيتعوض :))

باتمنى من كل قلبى
انى اضيف لعمرى حياة جديده مش اضيف سنه جديده لحياتى
وانها تكون سنه ليا وللجميع مليانه بالنمو الفكرى والثقافى والاجتماعى و-الذاتى -
قبل كل شئ :))

نمو لكل اللى زرعته فى الاعوام السابقه
حتى لو زرع صغير اتروى بدموع وألم وصبر
بس ولا بيهمنا D:
المهم انه ينمو وينمو ويفضل ينمو طول العمر :))

هحتفل بطفولتى اللى لسه موجوده جوايا
.. بحبى للتحدى و قلبى اللى مفتوح بنهم على الحياة
.. هحتفل بكل اللى اتعلمته وضاف ليا شئ جديد فى حياتى
.. بكل احساس حلو ولحظات جميلة عشتها فى وقت قصير ( بدون حسد D: )

يلااااااا نطفى النور يلا اااااااااا

ندخل فى عااااام جدييييييييييد

يا عسى هالعمر كله

للفرح والحب عيييييييييييد :))

أشياء لم تولد بعد ,,,

أجمل الاشياء ,, هى التى لم نفعلها بعد

أحلامنا التى مازالت معلقه فى رحم الحياة

أعظم الكلمات ,, التى لم نقولها بعد

الكلمات الغامضه التى نراها وراء السطور وبين الحروف

أروع الصور ,, التى لم نرسمها بعد

الصور التى نراها ببصيرتنا وليست بعيوننا

أحلى الاحاسيس ,, التى نخبئها بقلوبنا

فلا يتطلع عليها أحد غيرنا فيحسدنا

فمازالت بداخلنا كنوز كثيرة تريد من يحفر وينقب عنها ليكتشفها

وعندما نجدها ستهرب منها أحلاها وأجملها وأروعها

وهذا هو سحر الانسان الخاص الذى يملؤه الغموض :))

أسلحتى الخاصة :))

عندما يؤرقنى الحنين .. وتزداد غربتى
أدير مؤشر الراديو
أستمع اليها .. " أنا عندى حنين ما بعرف لمين "
يسحرنى صوتها فأنسى معاها وحدتى :))

أهرب من ملل الانتظار
بتعلم كل الاشياء التى أحبها
الرسم .. الموسيقى .. السفر
فاكتشف حياة جديده أضيفها الى عمرى الذى يتناقص:))

وسط الــ stress
والهموم وملل المذاكرة
أقرأ كتاب ممتع شيق .. فتينفتح قلبى على الحياة وحلاوتها :))

أحارب الاكتئاب
بفنجان من الشيكولاته وضحكه تعلن راية انتصارى:))

أقتل احساس البرد القارس
بحشر نفسى داخل قلوب أصدقائى وكل من أحبهم
فأشعر بتسلل الدفا الى وجدانى المرتعش :))